കുറഞ്ഞ വെള്ളം, കൂടുതൽ വിളവ്; ഇന്ത്യയുടെ പുതിയ ജീൻ എഡിറ്റഡ് നെല്ല് കർഷകരിലേക്ക്

ഇന്ത്യൻ കാർഷികരംഗത്ത് വലിയ മാറ്റത്തിന് വഴിയൊരുക്കുന്ന ജീൻ എഡിറ്റിംഗ് സാങ്കേതികവിദ്യയിലൂടെ വികസിപ്പിച്ച പുതിയ നെല്ല്  കർഷകരുടെ വയലുകളിലേക്ക് എത്തുകയാണ്. CRISPR-Cas9 സാങ്കേതികവിദ്യ ഉപയോഗിച്ച് വികസിപ്പിച്ച DRR Dhan 100 (Kamala), Pusa Rice DST 1 എന്നീ ഇനങ്ങളാണ് ഇതിൽ പ്രധാനപ്പെട്ടത്.

സാധാരണ ജനിതകമാറ്റം വരുത്തിയ (GM) വിളകളിൽ പുറത്തുനിന്നുള്ള ജനിതക വസ്തുക്കൾ ചെടിയുടെ DNA-യിലേക്ക് ചേർക്കുമ്പോൾ, ജീൻ എഡിറ്റിംഗ് വഴി ചെടിയുടെ സ്വന്തം DNA-യിൽ കൃത്യമായ ചെറിയ മാറ്റങ്ങളാണ് വരുത്തുന്നത്. അതുകൊണ്ടുതന്നെ വിദേശ DNA ചേർക്കാത്ത ചില ജീൻ എഡിറ്റിറ്റഡ് വിളകൾക്ക് ഇന്ത്യയിൽ GM വിളകൾക്ക് ബാധകമായ നിയന്ത്രണങ്ങളിൽ നിന്ന് ഇളവ് ലഭിച്ചിട്ടുണ്ട്.

ICAR വികസിപ്പിച്ച DRR Dhan 100 (Kamala), ജനപ്രിയ Samba Mahsuri അരിയിനത്തെ അടിസ്ഥാനമാക്കിയുള്ളതാണ്. CKX2 എന്ന ജീനിൽ നടത്തിയ കൃത്യമായ മാറ്റത്തിലൂടെ ശരാശരി 19 ശതമാനം വരെ കൂടുതൽ ധാന്യവിളവ് ലഭിച്ചതായാണ് റിപ്പോർട്ടുകൾ. കുറഞ്ഞ വെള്ളത്തിലും കുറഞ്ഞ വളപ്രയോഗത്തിലും മികച്ച പ്രകടനം കാഴ്ചവയ്ക്കാനും ഈ ഇനത്തിന് കഴിയുമെന്നാണ് ഗവേഷകരുടെ വിലയിരുത്തൽ.

മറ്റൊരു ഇനമായ Pusa Rice DST 1 വരൾച്ചയും മണ്ണിലെ ഉപ്പുരസവും പോലുള്ള പ്രതികൂല സാഹചര്യങ്ങളെ കൂടുതൽ നേരിടാൻ ലക്ഷ്യമിട്ടാണ് വികസിപ്പിച്ചിരിക്കുന്നത്. കാലാവസ്ഥാ വ്യതിയാനം ശക്തമാകുന്ന സാഹചര്യത്തിൽ വെള്ളത്തിന്റെ ലഭ്യത കുറയുമ്പോഴും നെൽവയലുകളിൽ ഉൽപാദനക്ഷമത നിലനിർത്താൻ ഇത്തരം ഇനങ്ങൾ സഹായിക്കുമെന്നാണ് പ്രതീക്ഷ.

ഇന്ത്യയെ സംബന്ധിച്ചിടത്തോളം ഇത് ഏറെ പ്രധാനപ്പെട്ട മുന്നേറ്റമാണ്. കോടിക്കണക്കിന് ആളുകളുടെ പ്രധാന ഭക്ഷണമായ അരിയുടെ ഉൽപാദനം വർധിപ്പിക്കേണ്ടതിനൊപ്പം വെള്ളത്തിന്റെ ഉപയോഗം കുറയ്ക്കുകയും കാലാവസ്ഥാ പ്രതിസന്ധികളെ നേരിടുകയും ചെയ്യേണ്ട സാഹചര്യമാണുള്ളത്. കൂടുതൽ വിളവ് കുറഞ്ഞ വിഭവങ്ങളിൽ നിന്ന് നേടാൻ ജീൻ എഡിറ്റിംഗ് സഹായിക്കുമെന്നാണ് ശാസ്ത്രലോകത്തിന്റെ പ്രതീക്ഷ.

എന്നാൽ ജീൻ എഡിറ്റഡ് അരിയെക്കുറിച്ച് ആശങ്കകളും നിലനിൽക്കുന്നുണ്ട്. ഭക്ഷ്യസുരക്ഷ, പരിസ്ഥിതിയിലെ പ്രത്യാഘാതങ്ങൾ, സ്വദേശീയ നെൽവിത്തുകളുടെ സംരക്ഷണം തുടങ്ങിയ വിഷയങ്ങളിൽ കൂടുതൽ ചർച്ചയും പരിശോധനയും ആവശ്യമാണെന്ന് ചില വിദഗ്ധർ ചൂണ്ടിക്കാട്ടുന്നു.

എങ്കിലും, കൂടുതൽ അരി കുറഞ്ഞ വെള്ളത്തിലും കുറഞ്ഞ വിഭവങ്ങളിലും ഉൽപാദിപ്പിക്കാനുള്ള ഇന്ത്യയുടെ ശ്രമത്തിലെ നിർണായക ചുവടുവയ്പ്പാണ് ജീൻedittad റൈസ്. ലാബിലെ പരീക്ഷണങ്ങളിൽ നിന്ന് കർഷകരുടെ വയലുകളിലേക്ക് എത്തുമ്പോൾ ഈ പുതിയ സാങ്കേതികവിദ്യ യഥാർഥത്തിൽ ഇന്ത്യൻ കൃഷിയുടെ ഉൽപാദനക്ഷമത എത്രത്തോളം മാറ്റിമറിക്കുമെന്ന് വരും വർഷങ്ങളിൽ വ്യക്തമാകും.

Content Highlights: India to introduce IARI developed Pusa Rice DST1 this rabi